Poesie in lingua veneta - Venezia e dintorni

LA STRAZZOSA
poesia in lengua venethiana del 500

Amor, vivemo con la gata e i stizzi
In t' una Cà a pe pian,
(E no vedo però che ti t' agrizzi)
Dove le lume e 'l pan
Sta tuti in t' un, la roca, i drapi e 'l vin ,
La vechia e le fassine,
I puti e le galine,
E mezo el cavezzal sot' el camin;
Dove, tacà a un anzin
Gh' è in modo de trofeo
La farsora, la scufia , e la graela,
Do' candele de seo,
Un cesto e la sportela,
E 'l leto è fato d' alega e de stopa ,
Tanto avallo che i pulesi s'intopa .

In pe d' un papagà se arleva un' oca,
In pe d' un cagnoleto
Un porcheto zentil che basa in boca,
Lascivo animaleto.
Soave compagnia; dolce concerto
L'oca, la gaia e tuti ,
La vechia, el porco e i putì,
Le galine e 'l mio amor sot' un coverto;
Ma in cento parte averto,
Onde la Luna e 'l Sol
Fa tanto più la casa alegra e chiara,
Come soto un storiol
Sconde fortuna avara
Una zoja, una perla in le scoazze ,
Un'estrema belezza in mile strazze.

El concolo dal pan stropa un balcon
Che no à scuri nè veri ,
Magna in tel pugno ognun, co' fa 'l falcon ,
Senza tola o tagieri;
Stà la famegia intorno a la pignata
A aspetar che sia coto,
Ognun beve in t'un goto,
Tuti magna co un bezzo de salata.
Vita vera e beata!
Un ninziol fa per sie
Che d' un di a l' altro è marizà dal fumo,
Man, brazzi, teste e pie
Stà a un tuti in t'un grumo;
Onde se vede un ordene a grotesche
De persone, de bestie e de baltresche.

In casa chi xe in camera xe in sala,
Chi è in sala è in magazen;
Gh' è nome un leto in l'una soto-scala;
Dove in brazzo al mìo ben
Passo le note de dolcezza piene;
Se ben la piova e 'l vento
Ne vien talvolta drento
A rinfrescar l' amor su per le vene .
Note care e serene;
Caro liogo amoroso!
Beltà celeste in povera schiavina
Covre un leto pomposo
Che a drento una gabrina,
Che fa in lu quel efeto un viso d'orca
Che in bela cheba una gaziola sporca.

In sta' Cà benedeta e luminosa
Vive poveramente
Sta mia cara d' amor bela Strazzosa;
Strazzosa ricamente;
Che con più strazze e manco drapi intorno
Più se descovre e bianchi
E verzeladi i fianchi,
Com' è più bel con manca ciole el zorno
Abito tropo adorno
Sora perle e rubini,
Sora beltà che supera ciascuna!
Qual se fra do' camini
Se imbavare la Luna
Che lusa in mezo, tal splende la fazza
E i razi de custìa fra strazza e strazza .

A sta beltà ste strazze ghe bisogna,
Che no se de' stroparla!
S' à da covrir de drapi una carogna
Che stoniega a vardarla,
Ma quela vita in st' abito risplende
Senza industria e senz' arte,
Massizza in ogni parte
Che nè cassi nè veli al bel contende;
Carne bianche e stupende
Al Ciel nude e scoverte
Per pompa de natura poverete ',
Onde a sto modo averte
E colo e spale e t . . .
No se pol tior un guanto ov' è l'anelo,
Se no perchè è più bel questo de quelo

Che drapi poria mai, se i fusse d' oro ,
Covrir si bei colori,
Ch' i no fusse un leame s' un tesoro,
Un fango sora i fiori?
Va pur cussi, che st' umiltà t'inalza,
Va, povereta, altiera
Cussi coi pie per tera ,
Che ti è più bela quanto più descalza!
Come el Ciel ne strabalza
A una belezza estrema
'In t' una casa che no ga do squele !
Oimè , che par che trema
Pensando che le Stele
Xe andade a catar fuora do' despersi
Per unir le to' strazze co i me' versi!

Strazze mie care, onde ò ravolto el cuor ,
Dolce strazze amorose
Finestre de le Grazie, ochi d' Amor !
Strazze fodrae de riose
Che se vede a spontar fra lista e lista
Fuora de quei sbregoni
Quatro dea de galoni
Che traze lampi che ne tiol la vista !
Fia mia, chi no t' à vista
E un omo mezo vivo ,
Chi te vede e no muore è un zoco morto
E mi che te descrivo
So che te fazzo torto
Che te tanso la gloria e te defraudo ,
E te stronzo l' onor più che te laudo.

Podessio pur con dar de la mia vita
Trovar più lengue a usura ,
Che la mia sola a una beltà infinita
E picola misura.
So che no digo gnente a quel che lasso,
Ma quel poco che intendo
El mesuro e comprendo
Co' se mesura el Ciel con un compasso .
In sta belezza passo
La mia vita contenta,
Che trova salda fede in veste rote;
No go chi me tormenta
Ne 'l zorno, nè la note;
Ghe xe un valor, un' anema in do' peti,
Cussi co' ghe n' è pochi in molti leti!

Cerche, Done, d' aver sfoghi de pianti,
Refoli de sospiri ,
E sempre avanti eserciti d' amanti ;
Formè niovi martiri,
Nutrìve cento diavoli in t'i ochi
Che tenta i cuor contriti;
Cerchè che mile afliti
Ve se vegna a butar morti in zenochi.
Amor, sti m' infinochi
Mai più, frizime alora ,
Che te parechio la farina e l'ogio.
Questa è la mia Signora,
La me vol , mi la vogio,
No go qua da arabiar nè da stizzarme ,
Chi vol guera d'amor se meta in arme.

Canzon mia rapezza
Sti è per sorte ripresa, e ti riprendi
Chi te riprenderà.
Mostra che ti l' intendi,
E che se ti no à drapi de veluo ,
Che quel ch' è Dio d'Amor va sempre nuo.